ලව් කේස් එකක් නිසා ශ‍්‍රීපාද විද්‍යා පීඨයේ ගැටුම්
පසුගිය (25) දා රාත‍්‍රී ඇතිවූ මෙම ගැටුමෙන් තුවාල ලැබූ සිසුන් 07 දෙනකු කොටගල ප‍්‍රාදේශීය රෝහලට ඇතුළත් කර සිටි අතර, එම සිසුන් 07 දෙනා සමග මෙම ගැටුමට සම්බන්ධ තවත් ගුරු සිසුන් 06 දෙනෙක් මෙසේ අධිකරණය හමුවට පමුණුවා තිබුණි.
පේ‍්‍රම සම්බන්ධතාවක් මෙම ගැටුමට මුල්වී ඇති බව දිඹුල පතන පොලිසිය පවසයි.
මෙම ගැටුම සම්බන්ධයෙන් වහා සොයා බලන ලෙස අමාත්‍ය ආරුමුගම් තොණ්ඩමන් මහතාට ජනාධිපති
මහින්ද රාජපක්ෂ මහතා ලබාදුන් උපදෙස් මත අමාත්‍යවරයා පසුගිය 26 දා පස්වරුවේ ශ‍්‍රී පාද අධ්‍යාපන විද්‍යා පීඨය වෙත ගොස් සිද්ධිය සම්බන්ධයෙන් පරීක්ෂණයක් පවත්වා එම සිසුන්ට එරෙහිව විනයානුකූලව කටයුතු කරන ලෙස විද්‍යා පීඨයේ පීඨාධිපතිවරයාට උපදෙස් ලබාදී ඇත.
මෙහිදී ආරුමුගම් තොණ්ඩමන් අමාත්‍යවරයා සිසුන් අමතමින් අවධාරණය කර සිටියේ මෙම විද්‍යාපීඨය දිවංගත තම සීයා වන සෞම්‍යමූර්ති තොණ්ඩමන් මහතා වතුකරයේ අධ්‍යාපන තත්ත්වය නගාසිටුවීමේ අරමුණින් ඉදිකළ බවයි.තමන්ට මෙම විද්‍යාලය ගැන සොයාබැලීමට අයිතියක් ඇති බවත් මෙහි තත්ත්වය පිළිබඳ ජනාධිපතිවරයා දැනුම්වත් කිරීමෙන් අනතුරුව ඒ මහතාගේ උපදෙස් මත පැමිණි බවත් ඇමැතිවරයා පැවසීය.
වැඩිදුරටත් අදහස් දක්වමින් අමාත්‍යවරයා පැවසුවේ යහපත් සිසු පරපුරක් බිහිකිරීමට මෙහි ගුණගරුක, විනයගරුක ගුරු පිරිසක් රටට බිහිවිය යුතු බවත්, මෙහිදී අධ්‍යාපන කටයුතුවල නිසිලෙස නිරත නොවෙමින් ගැටුම්කාරී අයුරින් හැසිරෙන්නේ නම්, මධ්‍යම කඳුකරයට විශ්ව විද්‍යාලයක් නොමැති නිසා මෙම විද්‍යා පීඨය වසා දමා උපාධිධාරීන් බිහි කිරීමට විශ්ව විද්‍යාලයක් ඇති කරන බවයි. විද්‍යා පීඨයට පොලිස් ආරක්ෂාව යොදවා ඇත.
ගාමිණී බණ්ඩාර ඉලංගන්තිලක - මස්කෙළිය / රංජිත් රාජපක්ෂ - බගවන්තලාව / ශන්ත හුලංනුගේ - ආගරපතන
